Biex tikkuntattja Uffiċjal tal-Aġenzija, tista’ titlob appuntament permezz ta’ enquirieslandregistry@gov.mt/enquirieslandregistrygozo@gov.mt. It-talba tintbagħat lill-uffiċjal rispettiv biex jiġi ffaċilitat appuntament miegħek.

L-Aġenzija għar-Reġistrazzjoni tal-Artijiet tirreġistra:

i. L-Ewwel Reġistrazzjoni tal-propjetajiet
ii. Trasferimenti ta’ propjetajiet
iii. Ipoteki/Waivers u l-kanċellamenti tagħħom
iv. Kawzjonijiet li jikkontestaw sjieda jew drittijiet reali iddikjarati.

Trid tiġi sottomessa Formola E f’żewġ kopji flimkien ma’ pjanta oriġinali tas-sit uffiċjali flimkien ma’ kopja tal-pjanta msemmija, liema pjanta trid tkun immarkata u ffirmata minn perit. Is-sottomissjoni ta’ Formola E tista’ ssir bi ħlas ta’ €30 li tista’ jew tintbagħat bil-posta jew titħallas fl-uffiċċji tagħna.

Preferibbilment u biex jiġi evitat dewmien, il-pagamenti għandhom isiru permezz ta’ cheque jew ħlas bil-card.

Jista’ jkun hemm żewġ każijiet fejn proprjetà trid tiġi rreġistrata:

1. F’kull area ta’ reġistrazzjoni –

(a) kull  kuntratt  li  jittrasferixxi  l-proprjetà  ta’  beni immobbli, jew xi dritt reali fuq dik il-proprjetà, inklużi opperazzjonijiet  li  għandhom  x’jaqsmu  ma  beni immobbli li jkunu taħt trust, jew li bih xi att li jkollu l-effett li jittrasferixxi l-proprjetà ta’ beni immobbli, jew xi dritt reali fuq dik il-proprjetà, jiġi xolt, imħassar jew revokat, u kull kuntratt li joħloq jew li jibdel xi dritt bħal dak jew li bih xi dritt bħal dak jinqaleb f’xi ieħor minn dawk id-drittijiet jew issir rinunzja għalih, u kull kuntratt li bih beni immobbli jiġu maqsuma, u kull att li jkollu effett dikjaratorju dwar il-proprjetà ta’, jew xi dritt  reali  fuq,  beni  immobbli,  (inkluż  att  magħmul għall-fini  tal-Att dwar it-Taxxa tad-Dokumenti uTraferimenti,  u  inventarju  magħmul  minn trustee li jaċċetta trust testamentarju u dikjarazzjoni unilaterali ta’ trust ta’  proprjetà  addizzjonali  taħt trusts,  iżda eskluż kull att ta’ inventarju ieħor) u kull kuntratt ta’antikresi; u

(b) kull sentenza li biha xi att li jkollu effett li jittrasferixxi l-proprjetà ta’ beni immobbli, jew xi dritt reali fuq dik  il-proprjetà,  jiġi  xolt,  imħassar  jew revokat, jew li tordna t-trasferiment tal-proprjetà ta’beni  immobbli,  jew  ta’  xi  dritt  reali  fuq  dik  il-proprjetà, jew li jkollha l-effett li toħloq ipoteka, u kull ipoteka li tinħoloq bis-saħħa tal-liġi; u

(ċ) kull trasferiment ta’ beni immobbli b’bejgħ bil-qorti, ukull fidi ta’ ċens magħmul skont l-artikolu 1501 tal-Kodiċi Civili,

safejn l-art inkluża fil-kuntratt, sentenza, bejgħ bil-qorti jew fiċ-ċedoli ta’ fidi jew milquta bl-ipoteka tkun qiegħda f’area ta’reġistrazzjoni, m’għandhom f’ebda każ jibdew iseħħu, dwar terzi persuni, sakemm u kemm il-darba t-titolu għall-art trasferita jew milquta, sew favur kemm kontra, bil-kuntratt, bis-sentenza, bil-bejgħ bil-qorti, bil-fidi jew bl-ipoteka kif imsemmi qabel, tkun reġistrata fil-ġurnal bil-mod preskritt.

2. Bla ħsara għal dak li jipprovdi l-artikolu 17(3), ir-reġistratur jista’, fid-diskrezzjoni tiegħu, bl-istess mod jirreġistra t-titolu għall-artijiet li qegħdin barra minn area ta’ reġistrazzjoni u nklużi f’xi kuntratt, sentenza, bejgħ bil-qorti jew fidi kif intqal qabel jew li jkunu milquta b’xi ipoteka kif intqal qabel u f’kull każ bħal dan hu għandu jagħmel ir-reġistrazzjonijiet xierqa fir-reġistru; u meta art tiġi hekk reġistrata dan l-Att għandu japplika għaliha daqslikieku kienet qiegħda f’area ta’ reġistrazzjoni.

Jista jkun hemm numru ta’ raġunijiet għalfejn propjeta’ ma tkunx reġistrata. Dan jista’ jkun għaliex il-propjeta’:

i) Mhux ġewwa Żona Obbligatorja ta’ Reġistrazzjoni
ii) Il-propjeta’ kienet akkwistata qabel maż-żona saret Żona ta’ Reġistrazzjoni tal-Artijiet;
iii) F’xi ċirkostanzi eċċezzjonali jista’ jkun li t-talba għar-reġistrazzjoni tkun għadha ma tressqetx;
iv) Instabu xi problemi waqt l-ipproċessar tal-applikazzjoni.

Jekk teħtieġ tweġiba mhux uffiċjali, tista’ tissottometti pjanta tas-sit (screenshot ta’ Google Map bi proprjetà in kwistjoni mmarkata tkun biżżejjed) flimkien mal-indirizz tal-proprjetà permezz ta’ email fuq enquirieslandregistry@gov.mt/enquirieslandregistrygozo@gov.mt fejn int tkun tista’ tiġi assistit.

Jekk tkun meħtieġa tweġiba uffiċjali, trid tiġi sottomessa Formola E f’żewġ kopji flimkien ma’ pjanta oriġinali tas-sit uffiċjali flimkien ma’ kopja ta’ dik il-pjanta, liema pjanta għandha tkun immarkata u ffirmata minn perit. Is-sottomissjoni ta’ Formola E tista’ ssir bi ħlas ta’ €30 li tista’ jew tintbagħat bil-posta jew titħallas fl-uffiċċji tagħna.

Preferibbilment u biex jiġi evitat dewmien, il-pagamenti għandhom isiru permezz ta’ ċekk jew ħlas bil-kard.

Jekk proprjetà ma tkunx f’Żona ta’ Reġistrazzjoni normalment din ma tistax tiġi rreġistrata, l-eċċezzjonijiet huma:

i) Reġistrazzjoni fil-parametri ta’ Liġi Sussidjarja 296.13 jew
ii) ikun hemm talba prevalenti minn Avukat/Nutar mogħtija mir-Reġistratur tal-Artijiet jew
iii) deċiżjoni tal-qrati.

Jekk proprjetà tinsab f’Żona ta’ Reġistrazzjoni, tista’ tirreġistraha volontarjament permezz tan-Nutar tiegħek.

Biex tirreġistra l-proprjetà tiegħek, id-dokumenti li ġejjin huma meħtieġa:

i) Id-dokument li juri l-mod kif il-proprjetà ġiet akkwistata, fil-biċċa l-kbira tal-każijiet huwa att jew testment;
ii) Pjanta uffiċjali tas-sit immarkata u ffirmata minn Perit kif deskritt fl-Avviż Legali 143.2019 (link to LN)
iii) Il-formola rilevanti għandha tiġi ffirmata u approvata minn Nutar li jirrappreżenta lill-klijent

F’dan il-każ Formoli A, B, C jew D jistgħu jiġu sottomessi. Ir-rekwiżiti ta’ kull Formola huma mniżżla fit-taqsima Formoli elenkati f’paġna 1 ta’ dan id-dokument.
Id-dokumenti ta’ hawn fuq għandhom jiġu sottomessi bl-idejn lill-Aġenzija tar-Reġistrazzjoni tal-Artijiet u se jiġu vverifikati biex jiġi żgurat li l-informazzjoni kollha tkun kif meħtieġ. Wara l-validazzjoni, jingħata numru tal-applikazzjoni lis-sottomissjoni u dan jiddaħħal fir-rekords tar-Reġistru. Imbagħad l-applikazzjoni tiġi pproċessata u riferuta lir-Reġistratur tal-Artijiet għal deċiżjoni.

Skont l-Avviż Legali 143.2019, pjanta uffiċjali tas-sit irid ikun fiha l-kriterji li ġejjin sabiex titqies aċċettabbli mill-Aġenzija:
1. Il-pjanta uffiċjali tar-Reġistru tal-Artijiet għandha tikkonsisti mill-pjanta li kellha tkun maħruġa mir-Reġistru tal-Artijiet wara t-13 ta’ Ġunju, 2011. L-iskala tal-pjanta għandha tiġi determinata b’rabta mad-daqs tal-proprjetà.
2. Il-pjanta għandha tinkludi l-informazzjoni li ġejja:
a) Is-sit u konfigurazzjoni eżatta
b) Id-distanza mill-eqreb kantuniera jew punt fiss ieħor
c) l-area
d) f’kaz ta’ propjeta’ urbana jew żvilupata, il-qisien tal-perimetru;
e) fil-każ ta’ proprjetà rurali mhux mibnija, il-kejl madwar il-perimetru sakemm l-għalqa/art relattiva ma tkunx imdawra minn ħajt li jidher fuq il-pjanta uffiċjali.
f) fil-każ fejn dik il-parti tal-pjanta murija fi skala ogħla minn 1:2500 tippermetti hekk, l-applikant jista’ juża l-pjanta uffiċjali biex jindika n-natura u l-firxa tad-drittijiet ta’ applikant ieħor;
g) il-livell tal-propjeta’ u/jew il-livell tal-bini;
h) f’kaz fejn hemm bżonn pjanti dettaljati addizzjonali, il-pjanti dettaljati għandhom jindikaw:
i. l-iskala li qed tiġi użata u għandha tinkludi jew scale bar vertikali jew horizontali;
ii. il-livell tal-bini mill-iktar livell baxx.
iii. kwalunkwe partijiet u drittijiet komuni fil-livelli kollha li huma gawduti jew li għalihom hija soġġetta l-proprjetà, liema drittijiet jiġu determinati mill-att tat-titolu tal-applikant;
iv. l-imsemmija pjanti għandhom jinkludu wkoll leġġenda fejn il-kulur aħmar jindika li l-applikant huwa s-sid, filwaqt li kull dritt ieħor għandu jkun indikat b’kwalunkwe kulur ieħor li l-applikant jidhirlu xieraq;
v. il-pjanta oriġinali u l-pjanti dettaljati debitament mimlija minn, jew taħt is-superviżjoni tal-perit skont dawn ir-regoli, għandhom jiġu ffirmati b’linka blu, mill-perit li għandu jpoġġi t-timbru uffiċjali tiegħu jew jikteb ismu b’ittri kbar taħt il-firma tiegħu; u
vi. pjanti dettaljati għandhom jiġu sottomessi fuq mill-inqas karta ta’ daqs A3

Pjanta tas-sit uffiċjali tista’ tiġi ordnata permezz tas-sit www.landregistryplans.gov.mt. Filmat fuq l-istess websajt juri kif tordna l-pjanta tas-sit, hija meħtieġa ħlas li jitħallas onlajn bil-card. Il-pjanta tas-sit tintbagħatlek bil-posta jew tista’ tinġabar bl-idejn mill-uffiċċji tagħna mit-Tnejn sal-Ġimgħa bejn it-8am u s-1pm.

Xiri ta’ pjanta jista’ jsir bi ħlas ta’ €6 għal kull pjanta ordnata.

Mal-preżentazzjoni tal-applikazzjoni lill-Aġenzija għar-Reġistrazzjoni tal-Artijiet, in-Nutar jingħata numru ta’ referenza relatat mal-applikazzjoni tiegħek. In-numru jikkonsisti fi prefiss LRA relatat ma’ applikazzjoni dwar ir-reġistrazzjoni ta’ proprjetà u LRC relatat mar-reġistrazzjoni ta’ Charge segwit minn erba’ ċifri u s-sena tas-sottomissjoni eż. LRA 1234/2024.  Sabiex tistaqsi dwar l-istatus tal-applikazzjoni tiegħek, għandek bżonn in-numru ta’ referenza pprovdut lin-Nutar tiegħek.

Jekk ikun hemm kwistjonijiet relatati mal-applikazzjoni l-Aġenzija tkun f’kuntatt man-Nutar li ressaq l-applikazzjoni jew il-Perit li ffirma l-pjanti u l-pjanti tas-sit meħtieġa, skont in-natura tal-ħruġ. Huwa imperattiv li ssegwi l-kwistjoni man-Nutar biex tiżgura li l-proċess ikun konkluż.

Tista’ tordna kopja permezz ta’ enquirieslandregistry@gov.mt/enquirieslandregistrygozo@gov.mt li mbagħad tista’ tinġabar bl-idejn bi ħlas. Il-ħlas għal ċertifikat tat-titolu huwa ta’ €5 għal dokument sa 5 paġni fit-tul, kwalunkwe paġni addizzjonali huma ta’ 50ċ kull paġna u jekk id-dokument jinkludi pjanti f’format A3 ikun hemm ħlas addizzjonali ta’ €1 għal kull paġna A3.

Kopji tal-applikazzjonijiet/dokumenti sottomessi jistgħu jintalbu bi ħlas ta’ 50ċ għal kull paġna A4 u €1 għal kull paġna A3.

Tiġi sottomessa Formola E meta tintalab tfittxija uffiċjali fuq proprjetà. Il-formola hija ppreżentata flimkien ma’ pjanta tas-sit. L-għan ta’ Formola E huwa li tinkiseb informazzjoni dwar jekk proprjetà hijiex f’żona ta’ reġistrazzjoni jew le kif ukoll li tikseb kwalunkwe informazzjoni dwar il-proprjetà speċifika jekk tkun diġà rreġistrata mal-Aġenzija.

Sabiex tiċċekkja l-istatus tal-Formola E tiegħek, tista’ tibgħat email fuq enquirieslandregistry@gov.mt/enquirieslandregistrygozo@gov.mt billi tagħti l-indirizz sħiħ tal-proprjetà, isem in-Nutar li ssottometta l-Formola E u d-data ta’ meta din ġiet sottomessa.

L-Aġenzija għar-Reġistrazzjoni tal-Artijiet tirreġistra titolu ta’ proprjetà li jista’ jkun Dirett Dominju, l-Utile Dominju jew liberu u frank.

Kiri inklużi Kirjiet Agrikoli mhumiex reġistrabbli fl-Aġenzija għar-Reġistrazzjoni tal-Artijiet.